A praia de Morazón

A fermosa praia de Morazón é o inicio dunha costa virxe e chea de currunchos marabillosos, un patrimonio natural de valor incalculabel, ademais de recoller e gardar unha riqueza mariña envexabel. Flanqueda contra a banda do porto por un fascinante pasadizo natural, a Cova da Danza; e pola outra banda a fermosa e única Pena da Herba. A partir dela comeza unha incribel viaxe para os sentidos durante a marea baixa, coma se fosen as 2000 leguas de viaxe submariña pero a ceo aberto. Recantos de coios e pelouros, fochas que conforman pequenas mostras do variado ecosistema mariño en forma de pozas, pequenas cafurnas e grutas entre as rochas, etc..todo nunha beiramar que entrega á terra pequenos tesouros pulidos polo mar con formas infinitas, un lugar máis que axeitado para crebar. E a partir de aí unha colección de pequenos, e non tanto, areais irrepetibeis, Os Lobos, Arnela, A Ducha (cunha auténtica ducha natural que nunca pecha a billa), Armenteiro, Lourido…todo baixo uns cantís frondosos e abondosos en árbores, plantas, matogueiras, herbas, flores autóctonas, todo inzado dun potente e poderoso verde. Perder algo asi, seria coma destruir unha igrexa románica, unha ponte medieval, ou calquera cousa de valor incalculabel

Ten unha area fina, limpa e ben pulida, rochas e pozas que a marea fai aparecer e dasaparecer, cantís inzados de natureza,ameixeiras, loureiros que rematan en preciosas linguas de rocha ou en agrupacións de coios e pelouros que tamén descubre na beiramar a marea. Auga limpa e cristaliana, sempre que a coidemos preservemos e non permitamos que alteren ou enturben a súa condición

Carta da costa de Galiza entre Laxe e Ribadeo

Castelo de Fontán

O Castelo de Fontán ten un gran valor histórico, artístico e patrimonial, xunto á Punta Corbeiroa constituen as coñecidas baterias defensivas que ilustran o escudo de Sada. Tamén reciben o nome de Portas Ártabras xa que se lles supon esa utilidade desde época preromana, e asi os antigos ártabros, a tribo céltica que agrupada en diferentes cláns habitaban as rias de Ferrol, Ares, Betanzos e A Coruña, asexaban desde esta punta a chegada de posibeis visitas. Tamén se rexistra aqui unha importante fazaña protagonizada por Manuel Colmelo Freire de Andrade, ao máis puro estilo galego. Segundo nos refire Lugrís Freire o 1 de xuño de 1809 chegaron á vila un oficial francés e 20 soldados a cabalo que lle solicitaron ao noso protagonista que lles proporcionara unha lancha para cruzar a ría. Colmelo asi o fixo, mais, xa de camiño, retirou unha táboa da embarcación afundíndoa, fito este decisivo, según Lugrís Freire para vencer aos franceses na famosa batalla de Ponte San Paio en Pontevedra. O Castelo de Fontán está catalogado como Ben de Interese Cultural desde o ano 1949, polo tanto outro valor máis a conservar e preservar, xa que é un dos poucos monumentos históricos que conserva o Concello de Sada, onde, nas últimas décadas, por desgracia, foron desaparecendo moitos deles, a pesar de posuir un grande valor cultural, arquitectónico, histórico e patrimonial, as máis das veces debido a especulación urbanística sen xeito e a despreocupación institucional.